ພະຍາດຕັບອັກເສບຊະນິດ B ແມ່ນຊື່ຂອງເຊື້ອໄວຣັສ ແລະ ຊື່ຂອງການເຈັບປ່ວຍທີ່ເຊື້ອໄວຣັສກໍ່ຂຶ້ນ ພະຍາດຕັບອັກເສບຊະນິດ B ເຮັດໃຫ້ຕັບຂອງທ່ານເກີດເຈັບປ່ວຍຂຶ້ນມາ ການດື່ມເຫຼົ້າເກີນຂອບເຂດກໍສາມາດກໍ່ໃຫ້ເກີດອາການນີ້ໄດ້ເຊັ່ນກັນ; ພ້ອມດຽວກັນຢາເສບຕິດ, ສານເຄມີບາງປະເພດ ແລະ ເຊື້ອໄວຣັສຊະນິດອື່ນກໍສາມາດກໍ່ໃຫ້ເກີດອາການນີ້ໄດ້ເຊັ່ນກັນ.
ຕັບຂອງທ່ານສຳຄັນຫຼາຍຕໍ່ສຸຂະພາບຂອງທ່ານເມື່ອມັນເກີດເສັຍຫາຍຂຶ້ນມາ ມັນອາດຈະບໍ່ສາມາດເຮັດວຽກໄດ້ດີຕາມປົກກະຕິ ແລະ ສາມາດເຮັດໃຫ້ທ່ານເຈັບປ່ວຍຢ່າງໜັກໄດ້ພະຍາດຕັບອັກເສບຊະນິດ B ບາງເທື່ອກໍເອີ້ນວ່າ ເຮັບບີ “hep B”.
ຂ້ອຍຕິດເຊື້ອຈາກພະຍາດຕັບອັກເສບຊະນິດ B ໄດ້ຢ່າງໃດ ?
ພະຍາດຕັບອັກເສບຊະນິດ B ຈະຕິດເຊື້ອຜ່ານສານຄັດຫຼັ່ງໃນຮ່າງກາຍເຊັ່ນ: ເລືອດ, ນໍ້າອະສຸຈິ ຫຼື ຂອງແຫຼວອື່ນໆ ຂອງຄົນໜຶ່ງທີ່ມີເຊື້ອພະຍາດຕັບອັກເສບຊະນິດ B ຜ່ານເຂົ້າໄປໃນເສັ້ນເລືອດສາມາດຕິດເຊື້ອຕັບອັກເສບຊະນິດ B ໄດ້ເຖິງແມ່ນວ່າປະລິມານເລືອດຫຼືນ້ຳກາມນັ້ນຈະນ້ອຍຈົນເບິ່ງບໍ່ເຫັນກໍຕາມ.
ສຳລັບເດັກນ້ອຍ
- ແມ່ທີ່ມີເຊື້ອຕັບອັກເສບຊະນິດ B ສາມາດແພ່ເຊື້ອໃຫ້ລູກນ້ອຍຂອງລາວໄດ້ຕອນເດັກເກີດຖ້າວ່າເດັກນ້ອຍບໍ່ໄດ້ຮັບການສັກຢາປ້ອງກັນໂດຍໄວ
- ເດັກນ້ອຍທີ່ມີເຊື້ອຕັບອັກເສບຊະນິດ B ສາມາດແພ່ເຊື້ອໃຫ້ເດັກນ້ອຍຄົນອື່ນທີ່ບໍ່ໄດ້ຮັບການປ້ອງກັນໄດ້, ໂດຍຜ່ານຮອຍບາດ ຫຼື ຮອຍແຜທີ່ບໍ່ໄດ້ປົກປິດໄວ້
ສຳລັບຜູ້ໃຫຍ່
ທ່ານສາມາດຕິດເຊື້ອຕັບອັກເສບຊະນິດ B ໄດ້ຈາກ:
- ການຮ່ວມເພດທາງອະໄວຍະວະເພດຍິງ, ທາງກົ້ນ ຫຼື ທາງປາກໂດຍບໍ່ໃສ່ຖົງອະນາໄມ.
- ເຂັມສັກຢາ ຫຼື ເຄື່ອງມືທີ່ໃຊ້ສັກເຂົ້າໂຕຢ່າງອື່ນຮ່ວມກັນ
- ສັກລາຍຫຼື ບ່ອງ ແທງຕາມຮ່າງກາຍດ້ວຍເຄື່ອງມືທີ່ບໍ່ສະອາດ
- ໃຊ້ແປງຖູແຂ້ວ, ມີດແຖ ຫຼື ມີດຕັດເລັບຮ່ວມກັນ
- ອຸບັດຕິເຫດທີ່ເກີດຈາກເຂັມ ຫຼື ຖືກເລືອດທີ່ມີເຊື້ອຟົ້ງໃສ່
ທ່ານບໍ່ສາມາດຕິດເຊື້ອຕັບອັກເສບຊະນິດ B ໄດ້ຈາກ:
- ການກອດ
- ການຈູບ
- ກິນອາຫານຮ່ວມກັນ ແລະ ໃຊ້ຖ້ວຍບ່ວງຮ່ວມກັນ
- ກິນອາຫານທີ່ແຕ່ງໂດຍຄົນທີ່ມີເຊື້ອຕັບອັກເສບຊະນິດ B
- ຖືກສັດ ຫຼື ແມງໄມ້ກັດ
- ເຫື່ອ
- ການຈາມ ຫຼື ໄອ
- ໃຊ້ຫ້ອງອາບນ້ຳ ຫຼື ສ້ວມຖ່າຍຮ່ວມກັນ
- ສະລອຍນ້ຳ
ຂ້ອຍຈະຮູ້ໄດ້ຢ່າງໃດວ່າຂ້ອຍມີເຊື້ອຕັບອັກເສບຊະນິດ B ?
ຄົນສ່ວນຫຼາຍຈະບໍ່ມີສັນຍານ ຫຼື ອອກອາການ ແລະ ບໍ່ຮູ້ສຶກເຈັບປ່ວຍຫຍັງ ວິທີດຽວທີ່ຈະຮູ້ໄດ້ແມ່ນຕ້ອງກວດເລືອດເມື່ອທ່ານຕິດເຊື້ອຕັບອັກເສບຊະນິດ B ຕອນທຳອິດ ທ່ານອາດຈະມີອາການດັ່ງນີ້:
- ຮາກ
- ໄຂ້ຄີງຮ້ອນ
- ເບື່ອອາຫານ
- ນ້ຳຍ່ຽວສີຄ້ຳ
- ເຈັບບໍລິເວນຕັບ (ທາງລຸ່ມແຖວກະດູກຂ້າງດ້ານຂວາ)
- ເຈັບຕາມຂໍ່
- ຕາ ແລະ ຜິວເປັນສີເຫຼືອງ
ພະຍາດຕັບອັກເສບຊະນິດ B ເຮັດຫຍັງໄດ້ຕໍ່ຮ່າງກາຍຂອງຂ້ອຍ ?
ເຊື້ອຕັບອັກເສບຊະນິດ B ຈະເຂົ້າໄປໃນເຊລຂອງຕັບ ແລະ ເຮັດໃຫ້ຕັບເກີດເຈັບປ່ວຍຂຶ້ນຮ່າງກາຍຕ້ອງເຮັດວຽກໜັກເພື່ອຕໍ່ສູ້ກັບເຊື້ອໄວຣັສທີ່ຢູ່ໃນຕັບນັ້ນຈະທຳລາຍຕັບ ແລະ ເມື່ອຫຼາຍປີຜ່ານໄປຈະເຮັດໃຫ້ຕັບຢຸດເຮັດວຽກໄດ້ ຢູ່ໃນກໍລະນີຂອງຜູ້ໃຫຍ່ສ່ວນຫຼາຍຮ່າງກາຍຈະກຳຈັດເຊື້ອຕັບອັກເສບຊະນິດ B ໄດ້ພາຍໃນ 6 ເດືອນຫຼັງຈາກທີ່ຕິດເຊື້ອ, ແລະ ທ່ານຈະບໍ່ສາມາດຕິດເຊື້ອອີກ.
ແຕ່ວ່າໃນກໍລະນີຂອງເດັກນ້ອຍແລະຜູ້ໃຫຍ່ບາງຄົນ, ບາງເທື່ອຮ່າງກາຍກໍສູ້ພະຍາດບໍ່ໄດ້ ແລະ ເຊື້ອພະຍາດຕັບອັກເສບຊະນິດ B ກໍຈະຢູ່ໃນຮ່າງກາຍຕະຫຼອດຊີວິດອາການນີ້ເອີ້ນວ່າ ‘ຕັບອັກເສບຊະນິດ B ແບບເຮື້ອຮັງ’ ແລະ ມັນສາມາດທຳລາຍຕັບ, ເຮັດໃຫ້ເປັນໂຣກຕັບແຂງ ແລະ ເປັນມະເຮັງຕັບການໃຊ້ຢາປິ່ນປົວສາມາດຫຼຸດຜ່ອນຄວາມເສັຍຫາຍຂອງຕັບ ແລະ ປ້ອງກັນມະເຮັງຕັບໄດ້.
ຂ້ອຍຈະເຮັດຢ່າງໃດຖ້າຂ້ອຍມີເຊື້ອຕັບອັກເສບຊະນິດ B ?
ທ່ານຕ້ອງໄປຫາໝໍທຸກໆຫົກຫາສິບສອງເດືອນເຖິງແມ່ນວ່າທ່ານຈະຮູ້ສຶກສະບາຍດີກໍຕາມທັງນີ້ ກໍຍ້ອນວ່າ ພະຍາດຕັບອັກເສບຊະນິດ B ບໍ່ເຮັດໃຫ້ທ່ານຮູ້ສຶກເຈັບປ່ວຍ ຖ້າວ່າທ່ານຮູ້ສຶກເຈັບປ່ວຍຂຶ້ນມານັ້ນກໍສະແດງວ່າຕັບຂອງທ່ານໄດ້ຮັບຄວາມເສັຍຫາຍແລ້ວ ພ້ອມດຽວກັບການກວດເລືອດທ່ານໝໍອາດຈະ
ຟາຍໂບຣສະແກນ (Fibroscan®) ດ້ວຍການເຮັດ Fibroscan® ແມ່ນການສະແກນຕັບເຊິ່ງທ່ານໝໍຈະກວດເບີ່ງໄດ້ວ່າຕັບໄດ້ຮັບຄວາມເສັຍຫາຍຫຼື ຕັບແຂງແລ້ວບໍ ແລະ ອາການຮ້າຍແຮງປານໃດ ຈາກນັ້ນທ່ານໝໍຈະເປັນຜູ້ຕັດສິນວ່າທ່ານຕ້ອງກິນຢາ ຫຼື ໄປຄລີນິກປົວຕັບ ຫຼື ໄປພົບແພດຊ່ຽວຊານດ້ານຕັບບໍ.
ພະຍາດຕັບອັກເສບຊະນິດ B ສາມາດປິ່ນປົວ ຫຼື ປົວໃຫ້ຫາຍຂາດໄດ້ບໍ?
ແມ່ນແລ້ວພະຍາດຕັບອັກເສບຊະນິດ B ສາມາດປິ່ນປົວໄດ້ ແຕ່ວ່າບໍ່ແມ່ນວ່າໝົດທຸກຄົນທີ່ມີເຊື້ອຕັບອັກເສບຊະນິດ B ຈຳເປັນຕ້ອງກິນຢາທ່ານໝໍຈະບອກທ່ານວ່າທ່ານຕ້ອງກິນຢາ ຫຼື ບໍ່ ຢາບໍ່ສາມາດປິ່ນປົວພະຍາດຕັບອັກເສບຊະນິດ B ໃຫ້ຫາຍຂາດໄດ້ແຕ່ວ່າມັນສາມາດຄວບຄຸມຄວາມເສັຍຫາຍທີ່ເກີດຂຶ້ນຕໍ່ຕັບຂອງທ່ານ, ເຮັດໃຫ້ເປີເຊັນທີ່ຈະເປັນມະເຮັງຕັບຕ່ຳລົງ ແລະ ຊ່ວຍໃຫ້ຕັບຟື້ນຟູປົວແປງໂຕມັນເອງ
ໃຫ້ປຶກສາ ແລະ ຂໍຄໍາແນະນໍາກັບທ່ານໝໍວ່າຢາຊະນິດໃດເໝາະສົມກັບທ່ານທີ່ສຸດ.
ຂ້ອຍຈະຊ່ວຍຕັບຂອງຂ້ອຍໄດ້ຢ່າງໃດ?
- ດື່ມເຄື່ອງດື່ມທີມີທາດເຫຼົ້າໃຫ້ໜ້ອຍລົງ ຫຼື ບໍ່ດື່ມເລີຍ
- ກິນອາຫານທີ່ດີຕໍ່ຮ່າງກາຍ, ອາຫານເພື່ອສຸຂະພາບ ແລະ ຢ່າໃຫ້ມີໄຂມັນຫຼາຍເກີນໄປ
- ຢຸດ ຫຼື ຜ່ອນການສູບຢາລົງ
- ອອກກໍາລັງກາຍຢ່າງສະໝ່ຳສະເໝີ
- ໃຫ້ຄວບຄຸມລະດັບຄວາມກົດດັນທາງອາລົມ
- ໃຫ້ບອກທ່ານໝໍໃຫ້ຮູ້ຖ້າທ່ານກິນຢາອື່ນໆເຊັ່ນ ຢາສະໝຸນໄພ, ຢາວິຕາມິນ, ຫຼື ຢາຈີນ ຢາບາງຢ່າງເຫຼົ່ານີ້ອາດໄປທຳລາຍຕັບໄດ້, ໂດຍສະເພາະຖ້າກິນປະລິມານຫຼາຍ ແລະ ກິນເປັນເວລາດົນນານ.
- ໃຫ້ປ້ອງກັນຕົວທ່ານເອງຈາກການຕິດເຊື້ອຕ່າງໆ ເພາະວ່າມັນອາດໄປກະທົບຕໍ່ສຸຂະພາບຂອງທ່ານຢ່າງຮ້າຍແຮງ ແລະ ເປັນສາເຫດເຮັດໃຫ້ຕັບຖືກທຳລາຍ:
- ໃຫ້ສັກສາຢາປ້ອງກັນພະຍາດຕັບອັກເສບ
- ຢ່າໃຊ້ເຂັມຮ່ວມກັນໃນການສັກຢາເສບຕິດ
- ໃຫ້ໃຊ້ຖົງອະນາໄມໃນເວລາມີເພດສໍາພັນ
ຂ້ອຍຈະຫຼີກເວັ້ນຈາກການຕິດເຊື້ອຕັບອັກເສບຊະນິດ B ຫຼື ແພ່ເຊື້ອໃຫ້ຄົນອື່ນໄດ້ຢ່າງໃດ?
ສັກຢາກັນພະຍາດຕັບອັກເສບ
ການສັກຢາກັນໂຣກແມ່ນວິທີທີ່ດີທີ່ສຸດເພື່ອຢຸດຢັ້ງການແພ່ຜາຍຂອງເຊື້ອໂຣກຕັບອັກເສບຊະນິດ B ການສັກຢານັ້ນປອດໄພຫຼາຍ ແລະ ມັນຈະປ້ອງກັນທ່ານໄດ້ຫຼາຍກວ່າ 95%
ເພື່ອຫຼີກເວັ້ນການແພ່ເຊື້ອຕັບອັກເສບຊະນິດ B ໃຫ້ໃຜຜູ້ໜຶ່ງ:
- ໃຫ້ໝັ້ນໃຈວ່າຜູ້ທີ່ມີຄວາມໃກ້ຊິດກັບທ່ານຕ້ອງໄດ້ສັກຢາປ້ອງກັນ
- ໃຫ້ໃຊ້ຖົງອະນາໄມ
- ຢ່າໃຊ້ ແປງຖູແຂ້ວ, ມີດແຖ ຫຼື ເຄື່ອງໃຊ້ສ່ວນຕົວອື່ນໆທີ່ອາດມີເລືອດຕິດຢູ່ຮ່ວມກັນ
- ຢ່າໃຫ້ຄົນອື່ນແຕະຕ້ອງແຜເປີດຂອງທ່ານນອກຈາກວ່າເຂົາເຈົ້າໃສ່ຖົງມື
- ຢ່າໃຊ້ເຂັມ, ເຂັມສັກຢາ ຫຼື ເຄື່ອງມືສັກຢາເສບຕິດອື່ນໆ ຮ່ວມກັນ
- ຢ່າບໍລິຈາກເລືອດ, ເຊື້ອອະສຸຈິ, ອະໄວຍະວະ ຫຼື ເນື້ອເຍື່ອຮ່າງກາຍ
ໃຫ້ໂອ້ລົມກັບທ່ານໝໍລ່ວງໜ້າເລື່ອງສັກຢາປ້ອງກັນໃຫ້ລູກນ້ອຍຂອງທ່ານຖ້າທ່ານກຳລັງຖືພາ ຫຼື ຢາກມີລູກ.
ຂ້ອຍຈະຂໍຄວາມຊ່ວຍເຫຼືອ ແລະ ຄຳປຶກສາໄດ້ຢູ່ໃສ?
ທ່ານສາມາດຂໍຄວາມຊ່ວຍເຫຼືອໄດ້ຈາກ:
• ທ່ານໝໍ
• ຄລີນິກສຸຂະພາບຈະເລີນພັນ
• ໜ່ວຍບໍລິການສຸຂະພາບຊຸມຊົນ
• ສູນວາງແຜນຄອບຄົວ
• ໂຮງໝໍສູນກາງ, ເມືອງ ແລະ ແຂວງ
ຂໍ້ມູນອ້າງອີງຈາກ: http://allgood.org.au/lo/%e0%ba%a5%e0%ba%b2%e0%ba%a7/%e0%ba%9e%e0%ba%b0%e0%ba%8d%e0%ba%b2%e0%ba%94%e0%ba%95%e0%ba%b1%e0%ba%9a%e0%ba%ad%e0%ba%b1%e0%ba%81%e0%bb%80%e0%ba%aa%e0%ba%9a%e0%ba%8a%e0%ba%b0%e0%ba%99%e0%ba%b4%e0%ba%94-b/
